طول عمري ضعيف في الرسم و اذكر اني حصلت في الاعدادية علي 8 من 20 في امتحان الرسم ... يعني كان فاضلي نمرة و اسقط و اعيد السنة
و بما اني انسان مش فني ... فلا اري ان الموناليزا صورة عظيمة و لا نيلة بالعكس شايفها صورة زبالة جدا لواحدة وحشة جدا ... و اتبسطت جدا لما عرفت ان في ناس بتقول انها اصلا صورة لراجل !!!!ا
.... المهم تظل الموناليزا عند كثير من الناس هي رمز الجمال !!! جمال علي ايه مش عارف ... و ان ناس كتير سموا بناتهم باسم الموناليزا من حبهم في جمالها !!!ا
و الميزة الوحيدة في الموناليزا (في رايي) هي ان هذه الصورة تضحكلك و تنظر لك في كل الاتجاهات ... حاجة كده بتفكرني بامن الدولة-او الامن الوطني (قال يعني في فرق) (يجعل كلامنا خفيف عليهم) كنت دايما تحس انهم معاك .. شايفيناك و سامعيناك بيبوصولك و زي الموناليزا بيضحكولك او بمعني اصح بيضحكوا عليك .. المهم ان الميزة الوحيدة في الموناليزا هي ضحكتها و نظرتها
حد عنده ميزة تانية؟؟
الميزة دي غطت علي كل عيوبها !!!! و راجع معايا عيوبها : انها وحشة .. شكلها اي كلام .. و في عيب خطير جدا كنا حننساه !!! انها راااااااااااااااااجل
احيانا كتير بنتعامل باسلوب الموناليزا في السياسة !! يعني لو انت منتمي لتيار او فكر معين و طلع حد من اتباع هذا الفكر غلط تلاقي مليون محامي بيدافعوا عنه .. و كلام بقي من عينة اصلهم استفزوه .. اصلهم مش فاهمينه .. اصلهم هما اللي بدأوا ... اصله راجل محقود عليه ... اصله رجل وطني ... يعني بالبلدي كده اقوللك الموناليزا طلعت راجل !!! تقوللي بس عليها ضحكة تجنن !!! ا طبعا انت فاهم اللي يقول كده يبقي ايه؟
المشكلة دي مش حاجة هينة تعدي و السلام .. لا يا لورد .. دي سبب و اساس الفساد في العالم كله ... و العصبية و القبلية و ظن البعض ان الحق معهم دون سواهم هي اللي ممكن تودي البلد في الكازوزا
علي الجانب الاخر هناك بقي سياسة ام عزيزة .. و سياسة ام عزيزة دي تستلزم مني اني احكيلك عن احد البسطاء اللي بيعملوا في وظيفة بسيطة في احد الاماكن اللي باشتغل فيها و اسمه ابو عزيزة
لقيته يوم مهموم .. سألته : مالك يا ابو عزيزة
ابو عزيزة : هو الاخوان فعلا ممكن يمسكوا الحكم
قلت : وارد
ابو عزيزة : يا نهار طين
قلت : ليه بس
ابو عزيزة : حيمنعوا البانجو .. يا خراب بيتك يا ابو عزيزة
اخدت خطوتين لورا و سالته : هو انت تاجر مخدرات يا ابو عزيزة
ابو عزيزة : يا ريت يا باشا هو انا اطول؟..... انا بس غاية ما هنالك لازم اضرب سيجارتين بانجو او حشيش مع كام قزازة بيرة كل يوم قبل ما ادخل البيت علشان استحمل الست ام عزيزة
قلت : بس اي حد حييجي سواء الاخوان او الشيوعين حيمنع البانجو يا ابو عزيزة
ابو عزيزة : كده يبقي بيتي اتخرب
قلت : معلش حاتدخل شوية في خصوصياتك هو انت متجوز بقالك كام سنة
ابو عزيزة : 10 سنين
قلت : و كل يوم لازم تضرب بانجو قبل ما تخش البيت؟
فرد علي ابو عزيزة قائلا : يا باشا ماهو لازم !!! لما سيجارة الحشيش تقابل قزازة البيرة في احد ميادين النافوخ العالي تلاقي ام عزيزة قلبت بقدرة قادر لنانسي عجرم...اما بقي لو مافيش بانجو يبقي خناقة لرب السما
قلت : قد كده انت مش طايقها
قال : و لا اقدر ابص في وشها لو فايق
استجمعت قواي و بصوت منخفض قلت له : ما زي ما دخلتوا بالمعروف ما تخرجوا بالمعروف و توفر علي نفسك صحتك و فلوسك ؟
قال ابو عزيزة : يا باشا و دا كلام برضه؟؟ العشرة ماتهونش الا علي ولاد الحرام ..و دي عشرة 10 سينين يا محترم
قلت : فعلا .. معاك حق .. العشرة ماتهونش علي ولاد الحرام فعلا .. و انت مش ابن حرام .. دا انت ابن حرام و ابن 60 كلب كمان
قال : ليه بس يا باشا الغلط؟
قلت : لانه مستحيل واحدة تعيش معاها كل ده و كلها عيوب!! و بعدين ما يمكن انت كمان فيك عيوب و هي بتضرب كاسين كونياك قبل ما تصطبح بوشك ولا يعني تكونش فاكر نفسك وائل كافوري؟
مشكلتنا هي اننا احيانا لا نري الا العيوب في الخصوم !!!! و لا نلتفت لعيوبنا
عايز الصراحة بقي ... احنا اللي موافقنا الراي بتعامل معاه باسلوب الموناليزا
و اللي ضدنا في الراي بنتعامل معاه باسلوب ام عزيزة
الرسول قال في حق هذا النوع من التعامل : دعوها فانها منتنة
و احنا فعلا تعاملتنا بقت لا مؤاخذة منتنة ... مافيش اي استعداد انك تلوم علي من هو منتسب لتيار مثلك او انك ترضي باي شيء ممن هو ضدك
و كل الكلام ده مع اننا مثقفين !!!!! بمناسبة الثقافة ....لو لي ان اطلق علي هذه الثورة اسم لسميتها: ثورة ال"ثقافة"!!!!ا
فقد قام بها المثقفون في التحرير و حموها من البلطجية
و امنها المثقفون في اللجان الشعبية و حموها من البلطجية ايضا
بس الخوف انه يبوظها المثقفون باختلافهم و تناحرهم اللي بقي عامل زي خناقات البلطجية
يعني .. يا ريت بقي نسترجل و بلاش اخلاق "وزير الثقافة" اظن كلامي واضح و مفهوم
كنت حاقفل النوتة هنا .. بس واحد صاحبي كان قاعد جنبي و انا باكتبها قال لي دلوقتي واحد يطلع يقول لك ان من تقديم المصالح اننا نبيح البيرة و الحشيش و الكونياك علشان آل عزيزة .. مش دا كلامك بتقديم المصالح؟
وقعت ع الارض من الضحك و قلت له : ايه رايك في شربة ماء زمزم في وسط الحرم المكي قدام الكعبة ؟؟
صاحبي : هو في احلي من كده؟
قلت له : بس دي ممكن تبقي حاجة وحشة
صاحبي : ازاي
قلت : لو بتشرب زمزم في وسط الحرم في نهار رمضان مجاهرا بالذنب
صاحبي : اه فعلا دي تبقي حاجة وحشة .. يا ابن اللعيبة
قلت : الا اذا كان هذا المفطر في نهار رمضان مريض او علي سفر او له عذر يبقي ساعتها مش حاجة وحشة
صاحبي : صح يا ابن اللعيبة تاني
الخلاصة ( مش كل من وافقك الراي صار كالموناليزا .. و مش كل من عارضك بقي زي ام عزيزة .. و مش كل شربة زمزم اخرتها لذيذة) و مش حازعل لو محدش فهم الكلام ده .. حاصبر و استحمل مش كل الناس عندها مخ
ربنا خلق الخيل و البغال و الحمير علشان نركبها و زينة
و خلق ناس اغبياء كي نشكره علي نعمة العقل ... فالعقل زينة
ليست هناك تعليقات:
إرسال تعليق