ليك في الكورة؟؟ ............حتي لو ماليكش ... اكيد خبطت في يوم من الايام في ما يسمي ب"الاستديو التحليلي" ... و لو ماخبطش فيه قبل كده ... ممكن احكيلك عنه شوية
بص يا سيدي .. الاستديو التحليلي دا عبارة عن شوية ناس قاعدة من قبل الماتش بساعة لحد بعد ماتش بساعة و هاتك يا رغي ... و المصيبة ان الكلام كله مكرر .. قال ايه .. لو المهاجمين تفوقوا علي المدافعين يبقي حنشوف اجوان .. اما لو المدافعين تفوقوا علي المهاجمين يبقي مش حنشوف اجوان !!!! و المصيبة ان الكلام ده بيتقال كل ماتش و المصيبة الاكبر انهم فاكرين انهم كده بيحللوا!!!!
و بحسن نية .. كل واحد من المحللين دول بيحاول يعمل لنفسه ستايل و يزود في التاليف و الافتاء ... و نجم نجوم هؤلاء المحللين هو اللاعب الموهوب و المدرب المغلوب و المحلل الغير مطلوب .. الكابتن فاروق جعفر .. الشهير بالكابتن خازوق جعفر
الكابتن خازوق لما تسمعه تحس انه مدرب من كوكب تاني ... فاهم و مستوعب و مافيش حاجه تفوت عليه ... مع انه بيدرب فريق شال طين من طوب الارض ... طيب اديني امارة يا ابو الكباتن علي التحليل اللي بتحلله ده ... فريقك مش بيكسب ليه؟
ومما لا انساه للكابتن خازوق .. انه كان مرة بيحلل ماتش ... و بعدين كان فلافيو (الله يمسيه بالخير و يبشبش الطوبة اللي تحت رجله) راجع من اصابة و منذ فترة لم يلعب ... فالكابتن طاهر ابو زيد سأله : تفتكر يا كابتن خازوق .. لو نزل فلافيو ممكن يعمل فرق؟
الاجابة الطبيعية(لاي ضيف غير الكابتن خازوق ) هي : ايوه يعمل فرق
انما علشان الكابتن خازوق عايز يعمل فيها فلوطة قرر يجيب اجابة تانية تماما !!!! قال : انا رايي ان فلافيو مايلعبش اصلا
ليه يا كابتن؟
قال : لان العضلة لسه مش واخده راحتها !!!! و لان اللاعب لما بيبقي راجع من اصابة التدفئة في الدم و اللزوجة بتاعت الدم مابتبقاش 100 100 فاللاعب مابيديش المردود المطلوب
طبعا الكام جملة اللي فاتوا دول لازم يتكتبوا بحروف من ذهب في تاريخ الكورة
اللزوجة ... التدفئة .. العضلة مش واخدة راحتها
ثلاث تعبيرات لم يسمع بهم اي طبيب او اي تمرجي او حتي اي مريض في العالم
من الاخر الكابتن خازوق بيفتي ... و من هنا صار الاستديو التحليلي اسمه : الاستديو التحشيشي
طبعا اول ما سمعت كلام الكابتن جريت علي كتب الطب و الهندسة و الفلك ابحث عن تفسير لما قال فلم اجد
اقوللك علي المفاجأة .... فلافيو يومها جاب جون !!!ا و انا فاكر اني فكرت جديا يومها اني اروح اعرض علي الكابتن خازوق جهاز اله حاسبة و اقنعه ان دا جهاز صيني كوري مشترك بيقيس اللزوجة و التدفئة و ارتياح العضلة ... و اهي سببوبة برضه
و علي راي حسن مصطفي في مدرسة المشاغبين : ييجي ابنك انت يبعلي الجهاز دهوه علي انه بيقشر لب؟
مش معني ان الكابتن فاروق كان لاعب و اصبح مدرب انه ينفع يبقي محلل كروي !!!ا
قبل الثورة علماء التيار السلفي كانوا لا يتكلموا في السياسة بتاتا !!! و لا من قريب ولا من بعيد
و البعض منهم في الاقطار المختلفة افتوا بعدم جواز الخروج علي الحاكم و لا حتي في مظاهرات سلمية
و في بعض البلدان العربية البعض منهم افتي ان شهداء ثورة يناير ليسوا بشهداء !!! يعني حماده هلال اخد مقلب و بعد كل ده طلع ان شهداء 25 يناير اللي ماتوا في احداث يناير ماطلعوش شهداء اصلا؟
بعد الثورة اصبح هناك نشاط سياسي للتيار السلفي ...حزب ... كلام في السياسة ... ندوات سياسية .. الخ .. الخ .. الخ
و ظهرت في اقل من 6 شهور 3 اخطاء مثل ال 3 اخطاء بتوع الكابتن فاروق جعفر
اولا : ان يهيب كبار العلماء السلفيين بالمسلمين ان يقولوا"نعم" في الاستفتاء و كانه واجب شرعي
ثانيا : غزوة الصناديق
ثالثا : وجوب التصويت للشيخ حازم ابو اسماعيل
المصيبة ان الفتاوي الثلاثة صدرت من كبار علماء السلف .. فالاولي كانت توصية من بيان لكبار العلماء السلفيين
و الثانية هو كلمة للشيخ يعقوب
و الثالثة هي ل حسن ابو الاشبال .. و اوعي تفتكر ان ابو الاشبال شيخ سلفي مغمور مثل ابو انس !!! لا يا باشا .. دا انا باسمع عنه من زمان و له مريديه... و هو اسم معروف في عالم الدعوة السلفية ... و يكفي انه قال انه هو من اقنع الشيخ حازم بالترشح ... يعني مش بعيد يبقي ذو منصب في حكومة الشيخ حازم
الخلاصة انه بصراحة مواقف شيوخ الدعوة السلفية مش عاجباني ... هم شيوخ في الدين علي عيني و راسي .. زي ما كان فاروق جعفر لاعب علي عيني و راسي
انما استديو تحليلي سياسي؟؟!!!؟ لا يا مشايخ ...مالكمش فيها
قبل ما انهي كلامي عايز اقول نقطتين
اولا : طالما حضرتك دخلت السياسة كحزب فانا من حقي تقييمك و الاعتراض عليك و رفضك لانك في النهاية حزب سياسي و لست حزب الله المختار
ثانيا : مش علشان قلت ان مرجعيتك اسلامية يبقي وجب علي كمسلم اني اسلمك رقبتي (حتي و ان كنت اعلم مني في الدين) فمثلا بن لادن كان يري انه علي الحق و ان مرجعيته اسلامية ... و الجهاد و الجماعة الاسلامية يقولون ان مرجعيتهم اسلامية .. و التكفير و الهجرة و العائدون من افغانستان و الاخوان و السلفيين و الصوفيين كل هؤلاء يقولون ان مرجعيتهم اسلامية .. و الشيعة و الاباضية و المرجئة و المعتزلة و الخوارج كل يدعي ان مرجعيته اسلامية !!! يبقي انا المفروض اسلم رقبتي لاي واحد يقول ان مرجعيته اسلامية او اي واحد يدعي ان معه دليل؟
اخبط القصة دي ... بعد هجمات سبتمبر كنت قاعد باتفرج علي الجزيرة و كان الشيخ القرضاوي (حفظه الله ) ضيفا في احد البرامج و كان ينتقد و يجرم هذه الهجمات الارهابية... اتصل به متصل و قال يا شيخ .. الدولة الاسلامية في افغانستان هي دولة خلافة و اعلنت الحرب علي الكفار الامريكان و الهجوم علي مبني التجارة هو مثل الهجوم علي قافلة ابو سفيان و الهجوم علي البنتاجون جائز لان البنتاجون كل اللي فيه جنود محاربين للاسلام .. و الضحايا الابرياء تنطبق عليهم قاعدة التترس بالدرع البشري المسلم (و هي راي بجواز وجود قتلي من المسلمين ابرياء اذا كانت هناك حرب و العدو يتترس بالاسري المسلمين و انه عدم مهاجمة العدو سيؤدي الي قتل عدد اكبر من المسلمين ) ... انتهي كلام السائل ... مش دي ادلة برضه... يبقي هل معني الكلام ده ان ما فعله اسامة بن لادن كان صحيحا؟؟؟؟؟
اللي عايز اقوله .. مش كل من كان شيخ و اتكلم كلام يبدو انه بالدليل و ربي دقنه وجب علي اني اسلمله دقني
يبقي الخلاصة : يمكن نختلف في مفهوم مزج السياسة بالدين ... و لكن اظننا لا نختلف في انه يجب يعتزل الكثير من رجال الدين السياسة .. لانهم بوظوا الدنيا بجد
لو انت من النوع اللي المقالة دي استفزته و مش عاجباه فانصحك انك تشيلني من عندك ... لان هذه المقالة ليست شيئا في ما هو قادم
و سلملي علي اللزوجة و التدفئة و ارتياح العضلات
ليست هناك تعليقات:
إرسال تعليق