الفنانة العظيمة نجاة الصغير اتحفتنا منذ زمن باغنية ولا اروع ولا احسن ولا انيل (علي رأي معلقين الكورة) قالتلك ايه بقي؟
قالت: اما براوة براوة اما براوة
دوار حبيبي تراوة اخر تراوة
(بصراحة انا مش عارف تراوة بتتكتب ب التاء ام طراوة ب الطاء؟)
المهم يعني الست نجاة بتوصل معلومة ان حبيب القلب صاحب املاك و عنده دوار و بحري كمان بدليل انه تراوة .... ماشي يا ستي اللي اداكي يدينا
و قالت في الشطر الغنائي التالي : قلة حبيبي مليانة و عطشانة يانا
لو حضرتك محضر دراسات عليا في القلل او ساكن في القللي او حتي مرة شربت من القلة
تعرف ان الدوار لما يبقي تراوة و القلة مليانة دا يساوي ان المياه اللي في القلة تبقي ساقعة و زي الفل لان القلة تعتمد اعتماد كلي و جزئي في تسقيعها علي التراوة و احيانا علي الطراوة
القصة باختصار ان الفنانة العظيمة وصلتلنا معلومة غاية في الاهمية و هي انها بتحب راجل صاحب ملك و عنده قلة و فيها مياه ساقعة و ان الفنانة عطشانة
يبقي ايه الحل؟ اكيد اي واحد مستوي ذكاؤه اعلي من الحمار بقليل حيقول الحل انها تروح لحبيب القلب تشرب من القلة و تقول يا حالوللا
الفنانة نجاة كان لها راي اخر !!!! قالت : اروحله ولا اروح اشرب حدانا !!!!!!ا
ايه ده؟؟؟ دا الفنانة نجاة طلع عندها هي كمان دوار و تراوة و قلة؟؟؟!!! ....و يتضح من السياق ان الحج (الصغير) ابو نجاة الصغير هو كمان كان من الاعيان و صاحب قلل !!!! طيب حضرتك بتصدعينا ليه؟؟ ما تشربي في بيتك ولا في دوار الباشمهندس صاحبك ولا تشربي من الترعة حتي !!!! احنا مالنا؟
و لكن الفنانة كانت عايزة تعلمنا ان احيانا الانسان بيألف مشكلة من لا شيء !!!!!! و دا تقدر تسميه ب(الدلع) او كما قالت هي في الشطر الغنائي التالي (اروحله ولا اروح و بلاش شقاوة....اما براوة براوة علي الشقاوة) نجاة بتتشاقي يا رجالة !!!!!!ا
في كل الاحوال نجاة حتشرب
و في كل الاحوال حتشوف حبيبها ماهو لو ماشفتوش علشان تشرب من القلة حتروحله علشان عاملين محشي كرومب
و لو مافيش محشي حتروح تشرب شاي او حتي قهوة سادة من غير بن
يعني من الاخر الست نجاة صدعتنا بمشكلة لا وجود لها !!!! لانه في كل الاحوال هي و الباشمهندس صاحبها حيتقابلوا بغض النظر عن السبب
تذكرت هذه الاغنية و انا اتناقش مع "واحد صاحبي ماتعرفوش" عن قضية الساعة : الدستور اولا
سألت صاحبي انت شايف ان توقيت الدستور حيفرق؟
صاحبي : طبعا
انا : حيفرق في ايه؟
صاحبي :يفرق ان لازم الدستور اللي يحطه يبقي ممثل فيه كل اطياف الشعب لانه دستور يخدم الشعب كله
انا : ماهو البرلمان منتخب من كل اطياف الشعب و بذلك يبقي اللجنة اللي حيختارها اعضاء البرلمان هي لجنة اختارها الشعب بطريقة غير مباشرة
صاحبي : بس اللي جاهز للبرلمان هما الاخوان و بالتالي فالدستور حيبقي دستور اخوانجي و مش بعيد يكون الاخوان عاملين اتفاق مع الجيش فيضعوا دستور يخدم الجيش و يبقي كده ماعملناش حاجه
انا :طيب و الحل
صاحبي :الدستور اولااااااااااااااا
انا : طيب و الاستفتاء؟
صاحبي : استفتاء ايه ....البلد حتروح في داهية ... و لو ماتعملش الدستور اولا ولادنا ضاعوا و البلد حتروح و... و.... الخ
في هذه اللحظة ...تذكرت الفنانة نجاة و هي بتغني : قلة حبيبي مليانة و عطشانة يانا
و سالت صديقي ... تحب الدستور يتحط ازاي؟؟ مش برضه عن طريق لجنة تاسيسية؟
صاحبي : طبعا
انا : و اللجنة التاسيسية دي لو مشينا بالسيناريو الحالي سيختارها مجلس الشعب المكون اعضاؤه من 50% من الاخوان (دا علي فرض ان كل مرشحي الاخوان نجحوا في مجلس الشعب) مش كده برضه؟
صاحبي : ايوه هو كده
انا : طيب ... لو حطينا الدستور بكرة الصبح ... مين يا تري يا هل تري حيكون اعضاء اللجنة التاسيسية ؟ اكيد حيبقوا اما اعضاء معينيين من المجلس العسكري ( اللي انت بتعتقد انه عامل اتفقاء مع الاخوان ) و بالتالي فالمجلس العسكري حيختار لجنة تاسيسية اعضاءها نسبة كبيرة منهم 50% او اكثر من الاخوان
او ان الحل يكون انتخاب قوائم للجنة التاسيسية و انا مغمض اقدر اقول لك ان الدستورحيبقي المادة الاولي فيه : ان الزي الرسمي للمواطن المصري جلابية من التوحيد و النور
اما الحل الحالم فهو ان المجلس العسكري يختار لجنة تاسيسية قوامها 100 واحد ليبرالي بس احب اقوللك ان كده نتيجة الاستفتاء علي الدستور حتبقي معروفة مقدما .... و اعضاء اللجنة التاسيسية الثانية المكونة لتعديل الدستور الموضوع من اللجنة الاولي برضه معروف مسبقا
من الاخر يا باشا علشان الرغي الكتير اللي مالوش لازمة .... اي لجنة تاسيسية لوضع الدستور في اي فترة من الفترات القادمة سواء دلوقتي او حتي بعد سنة سيكون للاسلاميين نصيب فيها و تقريبا في كل الاحوال العدد متساوي سواء كانت بالتعيين او بالانتخاب او حتي بعد البرلمان !!! بالعكس انا شايف ان اقل تمثيل للاخوان في اللجنة التاسيسية هو لو تم اختيارها من خلال البرلمان
هو انا مش شرحت الكلام ده ايام قصة "المجلس الرئاسي"؟ ولا انا لازم اللي اقوله اعيده ... و اللي اعيده ازيده؟
يا سيدي الفاضل احنا عاملين زي نجاة ... عمالين نلف و ندور حوالين نفسينا ... و في الاخر النتيجة واحدة
انا مش اخوانجي و مش حابقي اخوانجي في يوم من الايام و اختلف معهم كثيرا و لكن مش معني كده اني انكر وجودهم او جهودهم
و بما ان الاقصاء ليس من سمات الديموقراطية فلست مع الاقصاء
يبقي الحل هو ايجاد البديل
بالمناسبة لو عايزتعرف ازاي نوجد بديل للاخوان فالحل بسيط جدا ...احد اسباب قوة الاخوان هو انهم الفصيل الذي يراه رجل الشارع البسيط الذي يحب الدين انهم سياسيون ذوي صبغة اسلامية
فالحل مش اننا نقول : ما علاقة "الله" بالسياسة؟ ... لان ده ببساطة سيجذب رجل الشارع المصري البسيط اكثر ناحية الاخوان لان ذلك يؤكد له انهم التيار الوحيد ذو الصبغة الاسلامية
لو مش عارف تلاقي البديل فانا عندي البديل !!!!!!الفنانة نجاة الصغير جاهزة و فاضية وبقالها كام سنة مش لاقية شغل
و لهذا انا ادعو المصريين كلهم الي النزول الي ميدان التحرير الجمعة القادمة و حيبقي اسم الجمعة القادمة
انا نازل التحرير و حانتخب الفنانة نجاة الصغير
محدش برضه قال لي ... تراوة ب التاء ام ب الطاء؟
ليست هناك تعليقات:
إرسال تعليق